Shkolla e MagjistraturësShkolla e Magjistraturës në bashkëpunim me Projektin e Binjakëzimit, mbështetur nga Bashkimi Evropian, organizuan sot Konferencën e Hapjes, që shënon pikënisjen zyrtare të implementimit të projektit të binjakëzimit “Fuqizimi i efikasitetit, integritetit dhe profesionalizmit në sistemin e drejtësisë me anë të përmirësimit të kapaciteteve të Shkollës Shqiptare të Magjistraturës.”
Projekti i Binjakëzimit me disa prej institucioneve kryesore të trajnimit gjyqësor në Bashkimin Evropian, Shkollën Kombëtare Franceze të Magjistraturës, Shkollën e Lartë të Magjistraturës së Italisë dhe Qendrën e Studimeve Gjyqësore të Hollandës, synon të forcojë efikasitetin, integritetin dhe profesionalizmin e sistemit të drejtësisë duke përmirësuar kapacitetet e Shkollës Shqiptare të Magjistraturës gjatë periudhës 2024-2026 në formimin fillestar dhe të vazhduar profesional. Duke rritur kapacitetet e saj për të tërhequr më shumë magjistratë të kualifikuar, Shkolla e Magjistraturës do të jetë në gjendje të prodhojë një grup gjyqtarësh dhe prokurorë me cilësi më të lartë, që do të kontribuojnë në forcimin kapacitetet e sistemit gjyqësor për të mundësuar drejtësi efikase, efektive, të drejtë dhe transparente.
Aktivitetin e përshëndetën personalitete të larta dhe drejtues të institucioneve të ndryshme të sistemit të Drejtësisë, si dhe përfaqësuesit e trupit diplomatik në Shqipëri, si Drejtori i Shkollës z. Arben Rakipi, Kryetar i Këshillit Drejtues dhe Kryetar i Gjykatës së Lartë Z. Sokol Sadushi, Ambasadori i BE-së në Shqipëri, Silvio Gonzato, Kryetarja e Këshillit të Lartë Gjyqësor, Znj. Naureda Llagami, Kryetarja e Këshillit të Lartë të Prokurorisë, Znj. Mirela Bogdani, Ministri i Drejtësisë, Z. Ulsi Manja, Ambasadorët e Francës, Italisë dhe Hollandës, si dhe zv/Drejtori i Shkollës Kombëtare të Magjistraturës së Francës.
Aktiviteti vijoi me prezantimin e projektit të binjakëzimit përpara partnerëve nga drejtuesit e projektit, Z. Arben Rakipi dhe Znj. Emmanuelle Laudic Baron, si dhe me një seancë pyetje përgjigje ku pjesëmarrësit vendosën theksin tek rëndësia e implementimit të komponentëve të rëndësishëm të projektit të lidhur me rekrutimin, programin mësimor dhe formimin në detyrë të magjistratëve.
Më pas, seanca vijuese trajtoi çështjen e ruajtjes dhe përmirësimit të integritetit dhe garantimit të tij gjatë procesit të rekrutimit të kandidatëve për magjistratë, ku mbajtën ligjëratat e tyre përfaqësuesit e Këshillit të Lartë Gjyqësor, Z. Klodian Kurushi, përfaqësuesi i Këshillit të Lartë të Prokurorisë, Z. Erind Mërkuri, dhe pedagogu i brendshëmi Shkollës së Magjistraturës, Z. Dashamir Kore. Të tre folësit trajtuan kuadrin ligjor dhe problematikat gjatë procesit të rekrutimit, çështjet e integritetit gjatë rekrutimit dhe roli i shkollës për përsosjen e këtij procesi.
Ky sesion u pasua nga 3 seminare të njëpasnjëshme ku 7 folës trajtuan çështjet e përmbajtura në komponentët e projektit, që lidhen me praktikat e përmirësuara për realizimin e Programeve të Formimit Fillestar, Vazhdues si dhe metodat dhe praktikat e mira për rishikimin e provimit hyrës për magjistratët. Aktiviteti u konkludua me një diskutim të hapur me pjesëmarrësit dhe përshëndetjet përmbyllëse nga drejtuesit e projektit.
