Në kuadër të bashkëpunimit me Fondacionin Slynn dhe Ambasadën Britanike po zhvillon një vizitë studimore në Kolegjin Gjyqësor të Mbretërisë së Bashkuar një delegacion nga Shkolla e Magjistraturës, i përbërë nga Drejtori i Shkollës, Z. Sokol Sadushi, Pedagogu i Brendshëm, Z. Vangjel Kosta, Pedagogu i Jashtëm, Z. Sokol Berberi, dhe Z. Ador Koleka, Përgjegjës për Sektorin e Formimit Profesional.

Qëllimi i vizitës është që shkolla të marrë njohuri dhe informacion në lidhje me Kolegjin Gjyqësor si dhe sesi përzgjidhen dhe trajnohen gjyqtarët në Mbretërinë e Bashkuar. Njëkohësisht po synohet, nëpërmjet diskutimeve, të tërhiqet ekspertiza britanike në fusha të ndryshme të së drejtës, si menaxhimi i gjykatave dhe çështjeve, dhe arsyetimi i vendimeve gjyqësore dhe shkrimi ligjor, me qëllim realizimin e trajnimeve të kandidatëve dhe trajnimeve të vazhduara.

Gjatë qëndrimit delegacioni do të takojë përfaqësuesit e Fondacionit Slynn, përfaqësues të Kolegjit Gjyqësor si dhe përfaqësues të Organizatës Ndërkombëtare të Juristëve – ISLP. Njëkohësisht, krahas vizitave në gjykata të niveleve të ndryshme, delegacioni do të jetë pjesë e një trajnimi konkret të gjyqtarëve për një tematikë të caktuar në mbyllje të vizitës, për të parë sesi zbatohen në praktikë aftësitë praktike të gjykimit.